囍越 (屯門市廣場) (Closed)

今日下午我們喺油麻地同好朋友飲完茶之後，入咗去屯門做嘢，之後我們去咗好耐之前喺屯門市廣場食過覺得幾好嘅「囍越」食晚飯！我們叫咗生牛肉湯河粉嘅湯底味道相當鮮甜香濃，牛肉嘅肉質好鬆軟，肉味亦好濃郁，而且份量都幾多，而河粉嘅麵質就好煙韌軟滑！越式海南鷄「半隻」嘅肉質鮮味嫩滑，就算鷄胸嘅位置都唔會「嚡」感覺，但配嘅飯唔係鷄油飯，而係白飯！香辣豬肉鬆粉皮生菜包喺落單嗰陣我們問店員啲豬肉鬆可唔可以唔好咁辣？店員好親切有禮咁話：「當然可以！我幫你安排整小辣！」結果出嚟嘅味道真係好微辣，豬肉鬆嘅肉質相當爽滑彈牙，肉汁都幾多，唔會好乾身，就算用清甜嘅生菜包或用煙韌軟滑嘅粉皮包，又或者兩樣夾埋一齊包嚟食，都係咁惹味！香芒龍脷柳米紙卷外層嘅米紙卷質感好煙煙韌韌，入面包著有新鮮清甜嘅生菜、香甜嘅芒果同即炸嘅龍脷柳，肉質好軟滑，炸粉亦唔會好厚身，賣相好色彩繽紛！香芒糯米飯嘅糯米飯賣相同餐牌上或以前食開嘅唔同，以前係一個心形，而家係一個半球形，店員亦都有喺落單嗰陣同我們講過，雖然賣相無以前咁精緻，但糯米飯嘅質感就都係咁煙煙韌韌，芒果嘅味道酸酸甜甜，都幾醒胃！