Running 燒 (Closed)

食過一次番尋味，晚市抵係因為有海鮮燒，鍾意海鮮既朋友唔好錯過。肉類，韓式小食亦唔錯添。海鮮有好多種選擇，每款都好新鮮，必食生蠔，扇貝，燒酒蝦。生蠔，扇貝好大粒，燒熟後冇咩點縮水，仲係脹卜卜，一咬就流汁。燒酒蝦熟後，香濃既酒味滲透入蝦肉裏面，令肉汁更醉人。肉類都係普遍有既牛肉，豬肉，雞肉，羊肉。今次個碟有間隔，方便多。尼個setting好過上一次。雪花牛仔肉，賣相好吸引，雪花紋路好清晰，每面輕輕一燒就熟，充滿住牛肉既鮮甜。醬醃春雞脾肉，好大件，但因為係雞脾肉，所以燒完仲好嫩滑，醃醬唔會太濃味。青陽辣雞粒，細細粒，辣味夠，一口一粒好正。熟食方面叫左一碗水冷麵同炸雞，炸魷魚鬚。水冷麵涼浸浸，配埋熱辣辣既燒肉，特別好味。飲品都係罐裝為主，想飲酒既可以寫紙order，另外加錢，有各款啤酒，燒酒，梅酒。最後會送甜品，我叫左紅豆西米露，食到飽飽。