茶餐廳2.0 (Closed)

今日行開黃大仙呢頭，就諗起茶餐廳2.0，行到門口見到有冬日2.0暖粒粒煲就已經俾佢吸引到入左去。坐低再睇吓Menu，發現佢有個Cafe2.0精選二人餐都好吸引，事關我朋友好想試下威靈頓牛柳，所以唯有下次再試佢個暖粒粒煲。法式龍蝦湯溫度做得幾好，熱熱地但吹一吹又飲到，同埋感覺好鮮味，令人會想繼續飲落去，佢有啲配料一粒粒有啲口感。煙鴨胸雜菜沙律個煙鴨胸肥美可口，肉質嫩滑幾juicy，而雜菜就普通正常都爽口，有埋胡麻汁配一齊食，加添美味。卡邦尼煙肉蛋汁意粉首先要讚一讚啲意粉，好鍾意佢嘅口感好彈牙，而蛋汁唔會整到好流又creamy。最後係正宗威靈頓牛柳，佢有晒黑椒汁同燒汁，個人認為配燒汁正啲，威靈頓牛柳整得唔生但又唔會”韌”，酥皮厚薄均勻鬆化，白飯就普通正常，不過可能兩個人share會覺得個牛柳可以大舊啲就更perfect。套餐包熱飲，凍飲加$3，我哋嗌左凍朱古力同熱柚子蜜。要講一講佢個上菜速度預得幾好，差唔多食完一道就會黎另一道，最後主菜就要等一等。呢間雖然係茶餐廳，但感覺比較新穎，有好多唔同菜式任君選擇，重點仲要整得好食。