三姐廚房私房菜 (Closed)

成日都話工廈卧虎藏龍，又一次證實！今次試喺觀塘地鐵附近嘅三姐私房菜，未試過私房菜都知係好野，起碼用料一定有誠意。頭盤係有機沙津菜同流心蛋，沙津菜大大盤竟然都食得晒，而流心蛋係經過茶燻，伴上黑魚子同茄子，出奇咁夾！跟住位位一盅足料燉湯，我嘅係人蔘石斛螺頭湯，聽材料都夠架勢。飲落都真係好足料，人蔘味甘而不苦，加上有咬口嘅石斛，正。私房菜又豈可不食海鮮呢？叫咗條海班兩食，先係黑松露炒班球，班球鮮嫩滑口，松露味都好香。另一味就係燜頭腩，都幾滑不過多骨咗少少。又嚟三蔥鮑魚，爆到香一香，鮑魚一啲都唔韌！黃金私房大肉蟹，冇改錯名，真係啖啖肉大大隻！撈飯一流陳皮骨炸得鬆脆，真係好有陳皮味，聞落同食落都好甘香！仲有個水耕菜苗冇影，魚湯浸上，作為晚餐嘅句號啱啱好。