名館 (Closed)

名館有好多別緻嘅小菜，無論係係菜名，定係賣相，都係特別架！燒魂妙齡鴿個名就知係乳鴿啦，叫佢做妙齡鴿又幾可愛喎。燒得又幾香，外皮有少少脆度，肉質都幾嫩滑，唔需要任何醬汁都好夠味喇。秋涼就想食栗子炆雞，咁就叫個石鍋鮑魚栗子炆雞食啦！用石鍋盛住，上枱就啫啫聲，咁就已經相當吸引。栗子粒粒都圓碌碌，好肉厚呀，軟硬適中，唔會太硬，仲有細細隻嘅鮑魚仔，的的骰骰，又幾得意喎，所有食材都吸收咗醬汁嘅味道，好味！石鍋鮑魚雞粒炒飯都有好多BB鮑魚呀！我只係裝咗一碗，就已經有五隻鮑魚仔喇，當然石鍋裡面都仲有好多啦。飯粒炒到粒粒分明，夠晒乾身，係我喜歡嘅炒飯呀。我哋將個前菜大良鮮奶脆網卷當咗半甜品咁食，一上枱我都有先試一條，熱辣辣，外脆內軟，有鮮奶香氣。跟住就掛住食其他感食，到差不多最後先食多一條，都依然保留到個脆度，唔錯呀。到甜品喇！網紅小白兔！請問你哋三隻兔仔傾緊咩呢？個樣好可愛呀！外皮嘅口感似水晶包咁煙韌，入面就係豆沙，仲有d紅豆粒添。依個小白兔為今餐飯畫上完美嘅句號。