韓正屋韓國料理 (海壩街)

Open Now

Now Closed

好耐無黎韓正屋食，以前係荃灣返工成日黎，覺得佢又平又好食，今晚同舊同事食飯就揀左食佢啦。一坐低店員送上麥茶同餐牌，杯茶好香好好飲。點左個二人套餐A，因為唔想諗同想食泡菜煎餅。最快到居然係呢個石頭傳統雜錦豬肉飯，個窩勁熱小心呀。咋咋聲好正咁樣，揀左豬肉口味，配料有芽菜，菠菜，翠玉瓜等，仲有隻溫泉蛋。倒晒啲辣醬落去撈撈撈，正呀～飯香口，豬肉甜辣好好味，每一啖都有菜配料，仲有飯焦喔喔脆，好味好味。跟住上嘅係韓式煎泡菜餅，個盤同樣十分熱，要小心拎。泡菜下得多，酸酸辣辣加上又脆又香口，好味又有口感，正呀。再黎係炆牛肋骨煲，大大碗仲有一個白飯送。牛肋骨炆得十分軟腍，唔使點咬已經可以骨肉分離，完全不會黐牙，啖啖肉好正。蘿蔔同樣炆得軟腍，而且吸飽了湯汁好肉汁好甜呀，好味到整個湯飯連汁都撈埋。附送的白飯係珍珠米，綿綿的好好味。差啲唔記得仲有涼菜，是晚係菠菜同泡菜，送飯一流。二人餐仲有餐飲送，叫左凍檸茶同蘋果梳打水，檸茶走左甜都無苦澀，夠晒凍正呀。朋友叫左梳打水，跟餐要加12蚊，佢話甜甜地嘅蘋果蓉幾好味喎。唔使收加一㗎，抵食。呢個餐好多飯，仲有煎餅，真係好飽呀。