銀座蔵人 (Closed)

係灣仔食晏、最平30/40 蚊一碗麵有，過200/位既都有。 咁有時食平當然有時都可以厚待自己一下啦。 厚待唔係淨係講緊價錢，仲有個品質既。 係華美酒店1樓呢個日菜，係我認為想厚待自己時既其中一個好選擇。 午市都好旺場，要做定要等位既心理準備。餐牌上大多係定食既選擇，通常係鳥冬搭配壽司。 今日揀既係腐皮烏冬搭蔥吞拿魚飯定食。 先講茶碗蒸，滑既對路既，但水多左啲，即係稀左啲啲咁。 到個烏冬，腐皮大大塊。 烏冬係比較稔身，湯清淡但唔會寡，其實食完都飽左大半。 最後蔥吞拿魚飯。首先，啲蔥吞拿魚，好。重。手。好似個肉餅咁舖係個飯面。 我覺得係絕對夠撈均成個飯，但因為有預感食唔完所以我就無撈哂，邊食邊撈。 個飯有驚喜，因為除左吞拿魚同蔥，原來仲仲有銀魚仔同冬菇粒。呢兩樣野香得黎硬少少又加強返個口感，我認為係用心諗過既 餐後仲有餐茶同一球雪糕。成個份量應該係一位男士都會覺得滿足既。係酒店餐廳食日本野飽仲要幾好味都係百2蚊到，我覺得係耐唔時想食好啲既好選擇。