永樂園餐廳

Open Now

Now Closed

港式茶餐廳依家買少見少。永樂園都可以話係中環茶餐廳嘅表表者啦。係中環做過野嘅，冇乜理由未食個永樂園架啦。今日晏晝食一個蔥豉油王雞髀意粉。薑蔥係香港人必食架啦。好味道，如果撈飯可以食晒成碗飯。估唔到撈意粉都比我食晒成碟意粉。雞髀大大隻又唔算好滑，但係又唔可以話係鞋啦。加埋係啲豉油王其實算係唔錯喎。意粉就梗係港式意粉啦。唔好expect係意大利嗰啲好有咬口嘅靚意粉呀。不過都算唔錯。唔係林啤啤冇咬口嗰種。羅宋湯都算唔錯有好多蔬菜喺裏面幾足料嘅。酸得來呢都偏辣。其實幾開胃嘢味。之後梗係加一杯跟餐嘅凍鴛鴦。其實個人認為茶餐廳飲咖啡就等於自殺。多數呢啲茶餐廳咖啡都唔好飲，有啲隔夜嘅話仲會係酸嘅。喺茶餐廳港式奶茶呢就多數好飲喎。想飲咖啡攞個感覺呢我就會揀鴛鴦。呢度嘅凍飲大大杯好抵飲，而且感覺都幾滑。中午提吓神都幾唔錯。間中都鍾意呢度打下躉。點餐姐姐又唔算好有禮貌，但又唔會冇禮貌。要讚係做嘢好有速度。喺香港全世界都趕時間架啦。所以都OK啦。