朗悅軒

Open Now

Now Closed

之前有次staycation去左半山羅便臣道既宏基國際賓館，係好有歷史既老牌賓館，係教堂旁邊，坐擁無敵海景，不過今次天氣唔太好，無得係户外食飯。晚餐係朗悦軒食，可能因為疫情關係枱同枱都隔得幾遠，六點幾去到有四到五枱人，不過大概七點幾就就會多啲人。入去揀好位坐低，侍應會比口罩信封、消毒紙巾同餐牌，慢慢揀好再點餐。今次叫左臘味煲仔飯、蘑菇汁香煎牛脷配薯菜，可以選擇中或者西湯，配牛油餐包。熱辣辣既臘味煲仔飯有好多料，包括臘腸、膶腸、臘鴨、臘肉，加埋煲仔飯豉油，仲有飯焦，撈埋一齊好好食！蘑菇汁香煎牛脷都好有驚喜，一上菜既擺盤好靚，顏色豐富，蘑菇汁濃郁，牛脷油份夠煎到好香，薯蓉夠滑加好濃郁既牛油味，好想再添！最後就係飲品同甜品，有茶、咖啡，飯後甜品竟然係煎馬蹄糕，非常特別！值得推薦嘅除咗係美食，仲有靚景同貼心嘅服務！