古早牛肉麵 (Closed)

今日食台灣牛肉麵~~之前行經福榮街就已經留意到呢間古早牛肉麵，因為佢嘅裝修都非常有台灣特色。燈箱，懷舊海報等等，仿真度都幾高！7點已經有人等位喇，好彩食客流轉都算快，好快就有位坐。餐廳採用半自助式，餐枱上有張紙，自己tick完就可以交俾伙記，跟住落嚟就係等食喇。先講下湯底，深啡色嘅湯頭帶點甜味，肉味濃但不油膩。半筋半肉都好正，每一件牛肉旁邊都連住牛筋，牛肉嘅肉質淋，配上牛筋嘅爽口彈牙，每一啖都有好豐富嘅口感。個麵係帶有少少粗身，但扁扁地嘅直條麵，食落都幾彈牙，而且好夠飽肚，我食咗大半碗已經覺得夠晒飽，$60嚟講真係幾抵食！下次再去一定要試下個魯肉飯，因為見到隔離枱嘅客人食，好似好好食咁！