明師傅甜品 (Closed)

 原來，食好味啲嘅嘢真係要排隊㗎。事緣我同太太平時幫襯開隔離舖，今次因為唔想排隊，所以入咗呢間，我叫咗榴金歲月，即西米露加幾舊柑及一舊仔榴槤，我老婆就叫咗佢平時喺隔離舖叫開嘅芒果黑珍珠，即係蘭香子加芒果及椰汁，轉頭好快就到，我太太第一眼見到佢嗰碗黑珍珠，翻兩翻發覺質感好希，已心知不妙，試一口完全不是味兒，成碗唔食推咗俾我，我唯有照單全收，我發覺唔單只希，芒果又切到好細粒，仲要得幾粒，同埋好酸，我有垃圾焚化爐之稱亦只食咗一半就頂唔住，之後品嚐我嘅榴金歲月，嘩！成碗嘢除咗嗰舊仔榴槤分開食算係ok,其餘又係一個"希"字，不敢恭維，最後，我唯有超額啃咗兩碗"甜品"，跟住過返隔離買返碗外賣黑珍珠俾太太，仲要平呢間四蚊。今晚原本心情好好，就俾一個錯誤決定破壞整晚氣氛。其實幾年前明師傅開始進駐荃灣時挾住酒店師傅整嘅甜品喺眾安街開舖時幫襯過，嗰陣覺得唔差，點知幾年後喺呢間舖翻兜會變成咁嘅質素，究竟係我咁啱揀正兩樣明師傅最差嘅甜品，定係退步咗咁多？總之，以後唔會再因為唔想排隊而入咗一間令人後悔嘅食肆！