焰拉麵 (Closed)

假日同另一半去咗大棠睇紅葉，完左之後坐巴士返朗屏，落左巴士後行兩步就見到好多野食。簡左呢間日本拉麵店，裝修都好得意，好傳統風格，仲寫明唔做外賣咁串。入去後有亮點，細心之處係佢有個架係牆身，冬天大褸/袋都唔洗阻住自己食飯，讚!在下叫左個鮮焰拉麵，上碟時仲有幾條魚游左上黎。先飲個湯，好濃既豬骨湯，好香但無咩鮮味。因為我叫左濃湯底，大家記住鮮焰要配淡底啊，於是我加左好多佢哋自己釀既魚露，湯底立即好鮮味!麵身好軟，我叫左軟嘛！不過掛湯能力好高，濃濃既味道再食件叉燒先。一入口，雞黎嘅！我呢刻先記起我點左叉燒雞，因為佢個樣真係好似叉燒(豬肉)，我真心以為佢係一碗普通既叉燒拉麵。呢一刻真係好有驚喜，肉質鮮嫩唔會老，原全無overcooked，仲好入味。而且食完碗麵都唔會口乾，想飲好多水，湯底應該唔係靠味精，已經好過有啲係銅鑼灣登龍街，靠味精為生既拉麵店。食完野望入廚房，居然比我見到廚師係度即包餃子，但我望返點菜紙又無餃子比我點，原來係張poster既角落有寫。如果比我一早見到，我即刻點返份。自家製餃子喎，可以係一個宣傳點，都唔明點解得咁少提。