強記美食 (Moved) New Location

日頭食完酒店tea buffet，夜晚都仲飽緊，又想慳返d，都係踎街邊算喇。灣仔「強記美食」雖然地踎兼鋪頭細細（人滿仲要踎後巷），但就入選米芝連推介小食，都係唔少灣仔街坊宵夜勝地。提供的小食同糖水唔多，有粥、炒麵、糯米飯、魚蛋、蘿蔔、綠豆沙、喳咋、腐竹糖水等。臘味糯米飯（$36）分量大約一飯碗，佢唔係炒的糯米飯，而係加入臘腸、膶腸、冬菇一齊蒸煮，本來以為一定冇炒的咁好食，但原來都好入味，臘味的味道融入飯裡面，飯粒煮得軟糯，材料都好足，熱騰騰，相信冬天食更為滋味。豆卜芽菜豉油王炒麵（$19）的麵條色水唔錯，炒得乾爽，連埋芽菜一齊食更加爽口，反而寧星的豆卜冇咩味道，變得可有可無。魚蛋（$10）蘿蔔（$10）就比較普通，唔及車仔麵店的好食，只屬一試無妨。