孖寶去骨海南雞 (Go Go Mall)

Open Now

Now Closed

今日又去屯門練箭，練習前都搵d野食下，呢間孖寶海南雞好耐之前都試過唔錯，今日又黎食佢啦。店面細細，得幾張枱一眼望晒，人多時會比較迫d，今日中午1點左右黎都唔算好多人，但都有幾枱食客，地方細細就唔方便影個環境啦。坐底後都睇下餐牌，除左海南雞都仲有其他飯餐，價錢都係5-60蚊左右，不過都無包飲品，如加飲品就加6蚊，都合理。去骨口水雞飯（中）飯有得揀大或中，價錢差10蚊，由於不是太肚餓所以就揀個中size，黎到飯量就約1個飯碗左右，唔太肚餓當茶餐食都ok，先講講飯可揀白飯同油飯，我就揀油飯，佢地都係我鍾意既黃薑飯，黃薑味少少唔太濃，飯既質量偏硬身少少，我個人就ok，好過食濕飯，口水雞都係用返去骨海南雞，辣汁同雞係分開上，雞俾左脾位都幾滑，雞皮都爽口係差咁d啫喱，辣汁就少少酸辣同平時食開既口水雞辣汁有分別，都缺咁d花生香，我個人如果當海南雞點酸辣汁食係ok既，但如果一心想食正式既口水雞個感覺就會差d。凍檸茶跟餐加6蚊，叫左少甜但都朗偏甜dd，如果無少甜可能會更甜，要留意下，茶味輕微，凍飲水準普通無特別出色。整體黎講海南雞小店質素都叫唔錯，價錢都算合理，行開附近想食海南雞我都會再食。