群記清湯腩 (Closed)

日期：10月6日人數：3人數到大埔名物，不可不提呢間群記清湯腩。呢間野我真係由細食到大，應該都有十幾年。爽腩河粉價錢由20幾蚊食到而家$63 ，都仍然繼續幫襯，可想而知佢係有幾吸引幾好食。以前餐廳係1:00開門，我哋一家人係會大概12:45去到排隊，爭取食第一輪。依家係開12點，假日係唔開門嘅。小店出品，味道絕對比相片好。一上嚟必須趁熱先飲幾啖湯，之後食爽腩。清湯底的確係冇以前咁濃郁咁有牛味，但依然係好好飲，亦都真係冇味精，飲完唔口渴。爽腩好有嚼勁，亦極富牛肉味。雖然有人話辣椒油好食，但我從來未落過，因為好夠味。河粉係正常河粉，冇乜特別。小店環境就唔好要求咁多，但好乾淨衛生。服務都幾好，好有人情味。因為都好多人排隊，所以食完一般就會走人，不會再坐一會。