餃掂手工餃子雲吞專門店

之前食過一次餃掂，覺得幾正，見原來將軍澳都有分店，今日又順路黎開呢頭，就約埋個朋友一齊黎食啦。點完菜即送上酸蘿蔔，幾開胃。叫埋個菜因為想有番啲纖維，幾入味又唔會太腍。朋友想食雞翼，咁就叫埋呢個蜜餞雞翼了。外脆內軟，幾juicy,有啲後悔只係叫咗三隻。自己驚唔夠飽，叫咗個餃子麵，要大白菜豬肉餃。佢啲湯餃好大隻，難啲一口食哂，但咬開一半都唔駛驚下一啖得番個皮，因為佢真係勁足料。加上餃子呢類食物齋食又得，夾埋麵一齊食又得，令主菜嘅餃子有多一重感覺。今日嘅第一個皇牌：壽喜燒牛肉餃。朋友見到話呢個好似好正喎，平時無咩點見。叫咗八隻煎餃試試。望圖都見到煎得勁靚，咬落超脆，但裏面嘅牛肉又唔會變咗肉乾，加埋壽喜燒嘅味道，真係幾正！外面成日食啲料都唔會係呢啲料，真係幾獨有。今日嘅第二個皇牌：龍凰松茸餃。龍鳯應該指黑白松露？我見佢有得加錢轉淨白松露，但我無轉，覺得兩款都有口感再豐富啲。睇圖同上一張好似，都係煎得勁靚，唔駛食都知勁脆。食第一隻，啲松露味勁濃郁，真係開哂你個胃，食第二隻，咦！有啲唔同，望真啲，原來呢隻係白松露，味道淡啲，但同啲肉再夾啲。兩款都各有千秋。我覺得黑松露果個如果有麵夾埋一齊食會平衡啲