坤記煲仔小菜

Open Now

Now Closed

雖然西環「坤記」的煲仔飯超級出名，但自問愛食好東西的我昨晚才首度幫襯。七點左右去到，人多，同老闆娘講留位九時再來，呢段空檔便和朋友去附近的酒吧hea吓。九點來到人更多，但有留位下很快便安排到搭枱。來坤記當然要食煲仔飯，朋友不喜歡吃鱔，便叫了窩蛋牛肉及臘味雞兩款煲仔飯。另外，呢期練跑練得多，便叫了個招牌豬骨煲補下腳骨力。先上枱的是豬骨煲，夠晒大堆頭，豬骨湯內除有大有細的豬骨外，還有雞腳、蘿蔔、粟米、唐芹、馬蹄及腐竹，湯愈煲愈入味，膠質也愈來愈重。而且大件的豬骨內的骨髓好多呢，有點吃啫喱的感覺！而食到最後亦附送蔬菜，比你清清腸胃。等了一段不短的時間，期待已久的煲仔飯終出場了。先上的窩蛋牛飯賣相誘人，飯煮得粒粒分明，冇黏在一起，證明火喉一流，甜豉油味道調得剛好，伴起飯來相得益彰。最欣賞個飯焦唔會太燶，香香脆脆，之後又用些豬骨湯泡飯焦吃，變成另一極品也！後上的臘味雞飯有臘腸，潤腸，臘肉及雞，同樣出色，不過朋友話下次食的話會全選臘味，才會感到滿足。值得一提的是吃不完的豬骨加點湯拿回家，放雪櫃後第二天變成豬骨凍，加點水加熱後再吃依然好味呢！