馬六

Open Now

Now Closed

經過土瓜灣，發現開左間新餐廳，店入面裝修好有風格，乾淨企理，環境舒適。我地係兩點幾去食，仲可以叫一個午餐同下午茶。因為友人好肚餓又想食湯粉，所以揀左非輕量級份量嘅午餐。叫左老街冬菇雞絲湯金邊粉，用懷舊公雞碗上菜，有好香嘅冬菇絲及黃油雞絲，湯底配上鮮雞湯，有好濃嘅雞味，令人想一飲再飲，別有一番風味！我就揀左下午茶餐，見到有好靚嘅紫藍色飯，原來係沙巴燒雞配碟豆花椰醬飯。一上枱原來都幾大份，有花生及小魚乾作伴菜，仲有好大隻雞脾呀🤤 一咬開滿滿嘅肉汁，雞肉有陣陣嘅香料味，鮮嫩多汁，配上煙韌嘅紫藍色椰醬飯，有視覺同味覺嘅享受，超級滿足！我地仲叫左一份小食，獅城蝦春卷，春卷好脆口，入面配上蝦膠粉絲，但蝦味唔算好濃。餐飲方面，我叫左古仔路椰青沙冰，原個椰青上枱好吸睛，有淡淡嘅椰青味，而朋友就叫左杯桔仔檸檬茶，解渴一流。呢間幾有質素，份量又大份，價錢唔太貴，幾抵食，下次黎開附近會再幫襯。