拉麵來 (Closed)

好似好多人話呢間正，又排哂隊，我又去試吓。又中招！見 Openrice 冇人話佢差，我就冒住又俾人暗吋嘅 risk，都要寫出我感受。我食咗佢嘅名物「魂の一杯」。麵，冇乜彈牙感覺。我揀硬，但其實軟定硬唔會好影響到彈唔彈牙。佢係唔彈牙嘅。湯，好杰，但真啲，其實唔係好濃味。其實濃味同杰係兩回事，一風堂（香港都有）或一蘭（香港未有），個湯都唔杰，但好夠味。濃味如無敵家（池袋嗰間），個湯都唔使整到咁杰。叉燒，係我從來食過最差嘅。無論喺香港定日本，都未食過咁差嘅叉燒。以我嘅理解，日式叉燒應該用醬汁煮好多個鐘，煮到冧晒同入哂味嘅。呢度，就咁豬肉切片煎熟，冇味，好韌，真係好韌。希望唔會又有人同佢辯護話咁先正宗啦。卵，又係失敗之作，祇是未熟，而非溏心。但就算唔要求溏心，以半熟卵嘅標準，佢都唔合格。下圖左邊淺色部分蛋黃已熟透起粉，但大部分蛋黃又流哂出黎。令我覺得可惜嘅，係咁樣水準，都咁多人讚，咁多人排，做飲食嘅，就唔需要做啲好嘢出黎吸引食客喇。