牛涮鍋 (Closed)

一直以來都好鍾意食壽喜燒（日語：鋤焼き／すきやき）我講緊嘅係正宗嗰款，即係用少量醬汁烹煮食材的火鍋，而唔係一大煲湯嗰啲😅。通常食正宗嗰啲都係得幾片牛肉，當然你可以追加，不過遇上我哋呢啲肉食愛好者，真係唔夠喉。有日閒聊既時候，講起火鍋、燒烤都有任食，點解正宗嘅壽喜燒會無？原來大角咀奧海城「牛涮鍋」有，當日即刻走去試，結果係⋯⋯唔推薦！千祈唔好試！如果要食都建議食返正常火鍋。唔推介食正宗壽喜燒嘅原因：牛肉 - 我揀嘅係日本鹿兒島極上黑毛和牛肩脊肉，首先佢切嘅牛肉薄過紙，如果係打邊爐嚟講可能會冇事，但係要煎的話就唔多掂，因為太薄嘅關係好容易變咗肉碎，同埋根本食正宗壽喜燒就唔應該配咁薄嘅牛肉，佢根本冇將打邊爐同壽喜燒嘅肉分開切，薄得超誇張。另外因為黑毛和牛比較多脂肪，其實就等於我哋打邊爐，打咗一段時間嘅時候喺湯嘅上面會有一層厚厚嘅油，而壽喜燒因為冇咗湯，係個pan上面會有一層厚厚嘅油，所以你會由煎肉變咗炸肉🤣，所以真係唔推介！調味 - 佢嘅壽喜燒汁非常淡，而且佢會另外俾一樽糖你，佢會叫你落糖一齊煎啲肉令到啲肉可以造成焦糖化，但係當你煎咗兩、三次之後，因為糖嘅關係就開始多咗一陣燶味，極度唔好味。