點心廊 (Closed)

去享受一下高級茶樓，話明係高級，侍應服務當然係達致高級水平，茶具亦有氣派。創作六式拼盤($198)，靚靚既器皿，加上精美既食物，一定要比相機食先，我覺得食用既次序應該係由粉紅色蒸籠內食物開始，再由雪梨順序向後逐款吃。海膽鳳眼餃，海膽滑流鮮甜冇苦澀味，餡料有濃郁既西芹味。金箔墨汁蟹粉鮮蝦餃，漏左幫佢影一個大特寫，蟹粉餡料好多，而且墨汁皮唔會太厚太簿，岩岩好。黃金啤梨鹹水角，賣相已經好吸引，外皮脆得黎帶點煙韌口感。原隻鮑魚雞粒酥，鮑魚爽口入味，酥皮香鬆軟。一口燕窩蛋撻，燕窩晶瑩剔透，好滑，而且份量有蛋撻咁高，好滿足，下層蛋撻同樣香酥脆。黑白芝麻流心煎堆仔，外層帶有芝麻香味，內裏有湯丸，餡料係流心黑芝麻，好軟滑。流心鵪鶉蛋燒賣($48)，鵪鶉蛋燒賣相信好多人都食過，但係流心鵪鶉蛋真係第一次品嚐，隻蛋藏左入燒賣裏面，因為咬開左之後，蛋汁可以流到外層燒賣，令肉質提升口感層次。富士竹炭叉燒飽($38)，鬆軟既麵包，加上熱辣辣既叉燒，同埋個糖霜能帶出少少甜味，成個配搭都好完美。