連文記冰室

Open Now

Now Closed

去到荔枝角區當然要去工廈發掘下小店啦。呢間冰室嘅湯米線喺區內都幾出名，今日終於有機會去試下。一到入門，招牌好有舊冰室嘅感覺，幾有風味。見天氣凍凍地，我就叫咗個胡椒豬肚雞米線暖下胃。碗米線都幾足料，大約有四份一隻雞，皮薄唔多油，仲煮得幾嫩添。配料有黃牙白，芫茜同酸菜，食落幾醒胃。同事就揀咗豬扒腿蛋飯。雖然佢唔係招牌菜，但就充滿住男人嘅浪漫，非常野味。豬扒香口，火腿有特登煎過，少少燶邊，加啲豉油汁同蛋黃送飯，實在係大滿足！下次一於再嚟試埋佢嘅滋補推介 - 藥膳雞米線！