王子私房菜

Open Now

Now Closed

山長水遠入元朗探朋友，我對元朗就完全唔熟，由於朋友有大有細，朋友就話不如落樓飲茶啦。跟住朋友落樓下，帶到我去酒樓門口，望一望，點解咁熟口面嘅？原來係王子飯店嘅分支，王子飯店尖沙嘴分店就食過，食物質素就唔錯嘅，今日先知原來開到入嚟元朗，希望掛住王子個牌頭啲質素都有返咁上下啦。由於朋友有小朋友，於是就交俾佢發辦啦，費事叫咗啲小朋友唔食嘅嘢嘛。朋友簡簡單單都係叫咗啲點心，都係志在慢慢飲杯茶吹下水。都係奶皇包(小朋友鍾意食)，腸粉，菜苗餃嗰啲點心啦。因為大家都唔係太餓就冇叫咁多嘢費事食唔晒。味道都算唔錯，有返尖沙咀嘅水準。菜苗餃皮薄尤其出色。食下坐下傾下，好快食咗個幾鐘就散場，雖然啲嘢食唔錯，不過如果唔係探朋友都好難會特登入元朗食飯了。