唐記包點 (安富大廈)

Open Now

Now Closed

路德圍果然係荃灣嘅美食天堂，想掃街梗係嚟呢度啦。但係路過荃灣又趕住返工嘅情況下，最緊要快靚正，嗱嗱林買少少野返去先至慢慢食！原來唐記依家除咗蒸包蒸飯之外，都出咗唔少新產品。雖然蒸包係健康啲，但係今日想食香口啲嘅煎包，價錢唔貴之餘，賣相都唔錯，個個都脹卜卜，求其執咗三件返公司先慢慢食。香煎牛肉包煎包最香口，新鮮出爐熱辣辣，個包好軟熟， 牛肉餡入邊仲有啲洋蔥，好多肉汁而且味道啱啱好。香煎韭菜包韭菜嘅香味唔係人人岩，但呢個包就啱晒鍾意食韭菜嘅朋友。一咬落去啲韭菜味已經湧到出嚟，加埋少少肉係到點綴吓，啱晒注重健康又唔想食啖啖肉嘅朋友。煎餃子🥟係白菜豬肉餡， 香口得黎入面好多肉汁，而且餃子夠大隻， 又唔油膩，買三隻做下午茶小食就岩岩好。糯米雞估唔到入面咁足料，收埋左雞翼叉燒冬菇臘腸等材料。最欣賞都係糯米夠乾身，唔係濕立立林啤啤果d口感，一隻都夠晒飽，大件夾抵食。