Homeland (東昌街) (Closed)

去完龍尾灘玩，返到大埔想睇下附近有咩好嘢食，見到網上推介homeland 手工意粉，我即刻去搵路。就喺東昌街一個好細嘅門口，入到去原來卧虎藏龍。抗疫套餐，主菜配沙律及飲品都係一百蚊左右。我點了松露啡菇雞胸闊麵條$98， 加配德國腸拼盤$88。 朋友叫咗個 Egg Benedict $98，再加香辣蕃茄白酒煮青口$88。跟餐送嘅田園沙律🥗非常新鮮咬落去爽脆。個醋酸甜度調得啱啱好，好開胃。德國腸配酸菜薯蓉腸仔有3款：Regensburger, nurnberger, super prork cheese。 好多肉汁勁 juicy ， 腸皮好脆。 薯蓉打得好滑好creamy，薯香味重。 德國酸菜亦都好好味， 實在太好食如果可以多啲就好喇，勁貪心😛。松露啡菇雞胸闊麵條🍝果然眾望所歸，佢嘅手工意粉真係好高質素，通常我唔食咁厚嘅闊麵條，因為怕硬。但係佢呢個闊麵條好有咬口。 個 pasta 一放上枱松露味已經撲鼻而來，啡菇有菇汁好鮮甜。雞胸肉一啲都唔dry。 個忌廉汁做得啱啱好，好creamy， 完美地包圍每一條麵條。 上面啲沙律芽菜好清新，草香味濃， 加上爽脆嘅口感可以中和返heavy 嘅醬汁。