拉麵台風 (Moved) New Location

有次來到荃灣，聽講有間「拉麵台風」好出名，好多人讚似地道日本拉麵，就決定去試下啦。一去到，發現都真係幾多人排，心諗: 咁熱都咁多人肯等，依間應該真係好嘢嚟！排咗一陣，侍應見外面條龍都唔短，就遞上點菜紙，叫大家一路排隊一路揀定食咩先，都幾好服務嘅。過咗陣之後，就坐咗入近門口嘅位置，望到牆上面有幾搶眼嘅日本風壁畫，又係開放式廚房，依個時候感覺都仲係唔錯。我同朋友叫咗碗最普通嘅「魚介拉麵」同聽落有點伏嘅「骨膠原撈麵」，諗住一齊share食，睇下呢間拉麵店係龍定鳳。點知，由侍應放低碗拉麵個剎那開始，我就覺得去錯咗地方喇。首先入眼簾嘅就係乾到柴一般的叉燒，係好大件，但即使塊肉係浸係「魚介拉麵」啲湯到，都可以睇得出佢好乾，無疑一定出事。一咬落去，果然無意外，真的乾得很呢。嚼下嚼下，點解無咩味嘅? 明明义燒沾到望落幾濃嘅湯汁，無可能無味架?呷一啖湯汁，又明白了，原來湯都無味。唔係淡味，係真正既無香無味。「骨膠原撈麵」相對地就有咸味，但都係唔香。配料有大量叉燒，但都係又乾又淡。總括而然，呢間係我地香港食過既日本拉麵店之中，屬於中下水準。而呢個價錢已經可以食到更好既拉麵。