大榮華圍村菜 (Closed)

Item: Tai Wing Wah Vill Cuisine
Rating: 3
Author: 奧志雷

Tai Wing Wah Vill Cuisine

338 Reviews

Taste

Decor

Service

Hygiene

Value

3602

Kowloon Bay

$101-200

Hong Kong Style Dim Sum Dim Sum Restaurant

133

105

奧志雷

Level4

2.1K

Read full review

為豬油撈飯而來，悅媚從未品嚐過，推介推介。我每次都會自行先到達，打點所有、諗定菜色、開定靚茶，坐定定等美女降臨。竟然美女希望等埋一齊，希望接埋收工，才相相走去食飯。當然無問題，就由下次開始吧。

大量懷舊菜色、大量圍村菜色、大量手功菜色，真係花多眼亂，全部都想試呢。對上一次幫襯已經係 4 年前，驟眼望望菜牌都大同小異，沒怎麼大變動。唯一驚奇的是無需等位，大量座位任君選擇，以前晚飯時段排晒長龍等到嘔架喎，此情不再。

老牌酒樓侍應們都是叔叔、伯伯、嬸嬸，個個都對工作有熱誠，對食客有服務有招乎，雖然都是硬郎派，都滿意滿意啊。等我地兩口子，小試牛刀啦。

藍妹，只有藍冰及藍妹供應，藍妹吧。依隻酒樓藍妹好濃好苦喎，頭幾口還落得肚，飲左半支越來越熱，頂唔順，放棄。

砵仔豬油撈飯，熱燙燙送到，白煙輕飄，侍應隨即遞上豬油及頭抽。最初只落左小小，發覺好似唔多夠色喎，樂極忘形，落左兩次豬油同頭抽。搞到太過咸，太油淋淋，本應乾爽嚥韌香噴噴架，失敗了﹗

入口太油太鹹，敗在我手中。幸好唔難食，還食得到。飯粒仍然嚥韌，飯味香醇，係較濃味及較油啫。所以美女覺得麻麻地，真係非常抱歉。

砵仔豬油撈飯，再次挑戰 ﹗上次貪心地落太多豬油豉油，今次要保守一點。飯粒過濕過腍微爛不喜歡囉，飯香飯味及質地都大打折扣，次次都乾爽嚥韌，依砵完全失敗。

砵仔豬油撈飯，再三次挑戰 ﹗發覺頭抽要比豬油多，否則感覺會過份油膩，飯粒要乾爽才夠香口。砵仔飯紿終有點濕，免強可以接受。最後再來碗仔豬油撈飯，飯粒都係濕爛喎，味道點撈都係差少少，失望啊。

菊花五蛇羹，本來賣相平凡的蛇羹，添上菊花及檸檬葉後升價十倍，更香更靚啊。濃濃甜美老雞湯底，微黏濃稠，添上清香菊花檸檬葉，混埋蛇肉菇絲，熱辣辣品嚐，不用胡椒粉或醋已非常可口美妙，極為足料，非常好食喎。下次要試埋上八珍五蛇羹先得，唔知有咩特別呢？

滷水浸大雞腳，飄著煙熱燙燙送到，真係好大隻喎 ﹗啖啖肉，爽脆勁彈，滷水清甜不濁，完全食得到甜甜雞味，啜啜啜到乾乾淨淨，美味﹗

頭抽浸吊桶，我真的以為會原隻上檯架，劏開晒始終無咁好食。肉質半彈半嚥，咸中帶甜，食得到的魷魚鮮味，撈上麻麻更加香口，開心滿足。

香茜燒米鴨，茜從那裡來？感覺不到跟普通燒鴨有什麼分別呢。皮脆肉嫩，高水平的燒技，肉滑多汁，香料味清爽，蠻喜歡。

生魚兩食，翡翠生魚球，時菜炒生魚片。見石斑太大條，食唔晒，唯有經濟點食生魚囉。半碟炒西芹腍劈劈，另半碟爽脆脆，如何做到架？保留少許西芹清甜味道。生魚片藏著很多細骨，大部份都過熟乾鞋，只有幾片炒得剛好滑彈多汁。調味麻麻，食味一般，沾上蠔油會比較好味。

香茜生魚豆腐湯，我再一次挑戰芫茜，兒時芫茜一入口就反胃嘔吐，近年反應已無那麼大喇，幸好這個湯還能應付得到。奶白色湯汁魚味甜甜超濃郁，厚厚黏黏的動人開胃，還散發陣陣強烈獨特香茜味道。

雙冬枝竹羊腩煲，肥姐侍應您太激動喇麻，大叫仲咩開大火呀 ﹗燶架喇，暖住食咪得囉，烚菜就話要開大火啫。其實我地完全無掂過個火，一直都係肥姐控制，哈哈。肥姐侍應突然醒覺，自動收聲。

滾起出晒煙食得喇 ﹗香到不得了，流晒口水咯。冬菇比羊腩更好食，滑彈味濃又飽滿，完全係甜美羊腩湯味道。冬筍鮮嫩爽爽不硬無渣，炸枝竹沾上腐乳好味道，有馬蹄清甜味但見唔到馬蹄呢。

雙冬枝竹羊腩煲，羊腩骨多肉少，骨衫無咩肉食喎，勁多厚厚肥膏受不了，幾經辛苦搵到兩三舊淨瘦肉獻給美女。羊肉湯味道非常甜美好飲有料到，有肉味菇味馬蹄味。肥羊腩質地半滑半鬆化，食味平凡一般。生菜膽爽甜無窮，鮮嫩趙到索索聲。

花膠絲燴生翅，老雞湯汁可口好味道，魚翅不腥不嗅，不用浙醋夠晒味，黏黏厚厚清甜，有著爽膠爽翅，可以添食多幾碗呢。

脆皮燒雞半隻，凍冰冰變得更油膩，雞翼好燶，雞皮非常咸，但雞肉無味，齊齊咬可以平衡一下。髀肉結實略滑合格，胸肉雖腍但有點鞋，大埔樂天漁港師傅即炸好食百倍千倍。

瓦罉白胡椒焗石斑球，吱吱喳喳響，一開芬芳四溢。好少見的乾煲，完全無汁的。香噴噴口水流，大量薑蔥、蔥頭、白胡椒格外惹味。斑球啖啖肉，厚厚結實爽彈無得頂，魚味特濃散發鮮甜味道，非凡出眾無得彈。

清蒸龍虎斑，依條就係龍虎斑？到底點樣睇架？食落又真係好似有龍躉既滑、有虎斑既結實同魚味。只需 $168 蚊大大條好抵砌喎﹗

蒸得剛好無過熟，淋上極鮮魚汁豉油，厚厚的濕濕的黏黏的啖啖肉，魚甜多汁，啜到骨都無淨，滿意心心眼。朋友稱其實沙巴龍躉就是等於龍虎斑，我真的不知道呢。

紅燒排翅，竟然加入大量銀芽，好采已去根去豆，湯底夠甜美夠濃郁，已蓋過肥大芽菜腥味，入口清爽水潤，還有一絲絲幼幼翅針，合格但唔會再叫，因為有芽菜。想食上八珍燴蛇羹，不幸地已經過左季節喇，美女決定食紅燒翅，我有點猶豫，不過照食啦，最緊要您開心。

蟹肉扒豆苗，面頭的鮮嫩爽甜，但食到下面時有渣又老又粗糙。菜甜芡甜，味道不錯，不過蟹肉少蛋白多，食不到蟹鮮味。菠蘿生炒骨，大路夠甜夠酸，肉多骨少我鍾意，炸得外脆內軟，不乾不硬，高水準演繹。