正宗印度餐廳及酒吧 (銅鑼灣道)

Open Now

Now Closed

好耐冇嚟天后，發覺真係唔同曬，多咗好多食肆，仲要係好多都係小店，特色嘅小店都有唔少，咁啱今日行過就畀我發現到呢間主打印度菜式印度人主理嘅印度餐廳。間舖唔大，但就咁睇個裝修都發覺用咗唔少心思。個menu入面全部都係正宗嘅印度菜，即叫即做，而且價錢非常之平民，都有唔少選擇。入面地方雖然唔係好大，但係裝修到好似印度餐廳嘅感覺。一坐低佢哋就送咗個印度小食畀我試，仲配埋四隻唔同口味嘅醬，配埋嘅薄脆食非常之夾。印度炸雞：開頭諗住仲係平時食開嗰啲炸雞，原來係完全唔同，佢哋係用咗十幾款印度香料醃製而成，外脆內軟，非常之好食同入味。佢哋個menu有好多款唔同嘅咖哩，我就要左款白腰果汁印度咖哩配羊肉，另外再嗌多過原味薄餅，咖哩配薄餅永遠都係絕配。佢哋嘅薄餅即叫即做，仲好大塊。配埋佢嘅白腰果汁印度咖哩，簡直一流，最重要係啲羊肉一啲都唔騷，入口即溶，咖哩唔會好辣但係好香。我一個人食2款菜式，連汁都清埋，仲要非常之飽，證明佢嘅份量同味道都非常之十足。總結：下次約多個朋友再食過。