三家村水產 (Closed)

先講這裏的內部環境，中間有一扇大窗，可以望到維多利亞港，望落很舒服。今晚食飯得4枱客，有3枱都係坐近窗邊。 一坐低就出去海鮮檔睇下有咩食，呢度嘅員工都好詳細介紹每一款唔同海鮮，同可以點食。 揀咗一輪，我哋揀咗三款海鮮分別係聖子，貴妃蚌同蕃薯蜆。 頭兩款浜燒，而番薯蜆就用清酒煮。蟶子都算甜美，而貴妃蚌就厚肉。美中不足之處處佢只係用電爐燒，而不是用炭火燒。日式溏心蛋，味道都可以。最欣賞佢用好多菜墊底可以當沙律菜食。柚子牡蠣一夜乾， 應該係食緊燒金蠔，略嫌金蠔燒得硬咗少少，柚子味唔夠出。串燒雞翼，燒得啱啱好。冷稻庭烏冬，主要係畀我個女食， 跟餐一隻生鵪鶉蛋， 阿女食完我先敢撈落啲烏冬到。燒菠蘿，加咗肉桂粉，食落似食緊麥當當嘅蘋果批。燒味林河豚乾， 燒得啱啱好，唔會燒到硬曬亞女食咗大半碟。九州魚生丼，最特別嘅就係中間三片酸青瓜， 引發我最後嘅食慾食曬成碗飯。總括嚟講，人頭價錢略嫌貴咗少少。不過今晚客唔多，員工都好用心跟我們解釋每一道菜， 服務滿分。另一不足之處，就係每當有船泊岸的時候，汽油味都會飄入餐廳內。如果唔想聞汽油味，可能要坐遠窗邊少少啦。