Bravo! (Closed)

收工很餓決定去太安樓掃街快食晚餐。聽同事講有間煎餅係北京口味覺得好好奇，所以去到就第一時去試下先。門面一如太安樓特色，簡單，方便，透明。煎餅選擇比我想像中多，我以為得４—５款。另外仲有飲品供應：豆漿/玉米汁/酸梅汁。最正係仲有北京涼粉，但我太餓只想食咸食，所以淨係叫咗個北京烤鴨煎餅。俾完錢就企一邊等，OPEN KITCHEN 可以隔住玻璃睇製作過程。一邊睇一邊諗緊自己會唔會食唔哂，因為見到店員不斷加材料落塊餅到。好！足！料！咁就睇已經見到有好多紅蘿蔔絲，青瓜絲同烤鴨。拎上手果下好熱，完全食唔到，想由底部慢慢推佢出黎都有難度，唯有整爛個紙袋慢慢試下咬。第一啖食到好多嘢，具體味道太雜亂。慢慢食落去有北京烤鴨醬嘅味，唔算太濃烈，係咸咸地嘅燒醬味。好可惜，餅底好淋，又熱又油，食到成手都係水同油嘅混合。材料係好足，份量超大，睇得出店員好有心做，不過味道真係不算太特出，不過不失啦。自己一個女仔食完真係超級飽。