上海婆婆336 (Closed)

放工後約左朋友係九龍灣，原本諗住係德福食飯，點知周圍都要等位，肚餓既我地最後都係行去淘大食。淘大花園相信因為沙士而一夜成名，講真，沙士前我真係未聽過呢個屋苑架。上海婆婆位於淘大花園商場以外，由德福行過去都只係需要5分鐘，相當方便，我地7點半到黎到，都唔洗等位，真係開心。其實呢間餐廳都有好多分店，都食過好幾次，所以其實唔係點需要睇餐牌都OK。我地一行3人叫左一份生煎包，一個擔擔麵，一份小籠包，一份醉雞同埋椰香糖湯圓。花雕醉雞: 講話醉雞，就梗係用酒浸住D雞架啦，平時唔係點飲酒既我，對呢味菜興趣真係唔大，所以只係試左少少，發現酒味比想象中無咁濃，雞皮爽口而且雞肉都幾滑添。擔擔麵: 因為有朋友唔食辣，所以叫左小辣，麵既條份量都算多，湯有肉碎同麻醬，味道都幾濃郁。生煎包: 一份有3個，真係剛剛好可以一人一個，包皮煎得好香，裡面既肉汁亦都好入味。小籠包: 小籠包既皮都幾薄，唔會咁易穿，入面粒肉亦都好多湯汁，味道亦都好鮮甜。椰香糖湯圓: 女生們真係奇怪，個胃真係有特別功能，明明話好飽，仲可以叫甜品。呢味椰香糖湯圓，賣相相當似糖不甩。包著香濃芝麻餡既湯圓，再係上面沾上椰絲砂糖，真係令我地食到停唔到口