三星台菜食堂 (新城市廣場一期) (Closed)

下晝約咗友人去新城市行街，因為朋友晚上有事，於是我哋就決定早啲食晚餐。Check 咗啲食肆，睇到呢間三星，因為我哋兩個人都好耐冇食台灣嘢喇，於是就決定食呢間。大概係時間仲早（大約傍晚6:30），去到嘅時候人唔多，可以馬上入座，如冇記錯，佢係限時食個半鐘嘅。因為大家都唔算太餓，所以就決定每人嗌一碗麵。我因為鍾意食辣，就叫咗一碗麻辣三星麵，至於我個朋友，佢就嗌咗一碗花雕雞髀麵。小食方面，我哋要咗一碟蒜泥白肉。麻辣三星麵有牛腱、牛筋同牛肚。牛腱同牛筋煮得夠腍，係我鍾意嘅口感。個湯底夠濃郁，亦都夠麻辣，配上粗麵，食落有滿足感。我朋友嗰碗花雕雞髀麵，我都試咗一啖湯底，非常重花雕味，唔錯。至於碟蒜泥白肉，我個人就覺得非常之麻麻。比起其他餐廳嘅蒜泥白肉，佢啲蒜泥唔夠多，肉亦都切得太厚，下次嚟會選擇其他小食。其實餐牌上最吸引我嘅係佢嘅甜品。不過我哋實在冇個胃口食咁多，下次有機會搵多幾個人去食佢嘅古早味黑糖刨冰，一定好過癮😋！