Bulldog's Bar & Grill (Closed)

今日下晝要應酬一個過境旅遊的朋友，大家在蘭桂坊認識，就約了在蘭桂坊。無見幾年，她樣子也沒有多變，變的只是蘭桂坊的市況。今日所見，不知怎的，蘭桂坊午市異常的冷清，除左California及Post 97叫多D人，其他食肆都在拍烏蠅，呢度咁大間吧都係得四個客咁大把，清一色全洋人。午市有套餐，一百蚊唔使有三道菜，好似幾抵食，就都要了這個。頭盤是湯或豆腐沙律，而大家都揀了沙律。沙律份量不少，但材料算簡單，除炸豆腐外，還有沙律菜及蕃茄等，淋上花生醬汁，幾泰式風味，如可以加一點酸味就更好了；主菜是牛及魚，一人選一樣。我的西冷牛扒要raw，煎出來都夠生，交到功課。當然肉質不算好，當是午餐填飽肚子還可以。伴碟有不少的炸薯塊及烚紅蘿蔔、西蘭花等，唔使驚唔夠飽。她的是魚柳，賣相麻麻，味道亦應好不到那裡，但鬼妹食慣，又唔覺有咩問題；甜品是雲呢拿雪糕或甜餅二選一，都選了雪糕。雪糕用個中裝玻璃杯上，意外地都幾認真，算是最好味的一道菜；幾位南亞裔女侍應，全程笑容滿面，服務唔錯。連凍飲兩杯，埋單二百蚊，不收加一。鬼佬菜色，味道普通，但地方幾好坐，同朋友見面都適合。