京笹居酒屋

Open Now

Now Closed

呢間係日本朋友介紹嘅，估唔到外表平平無奇，入到去好似入咗隨意門咁，睇到個過膠menu 同手寫餐牌，耳邊日文交談聲不絕於耳，頓時有種“返鄉下”feel。佢菜式種類好豐富，睇menu 都有排揀。佢話池魚當造所以叫咗個池魚刺身。我其實唔鍾意sashimi ，因為好怕海水味，有都淨係食拖羅同河豚，但呢個池魚刺身有魚味得來完全唔腥，連我呢啲非刺身愛好者都食唔停口。同埋佢賣得好快，好彩我哋叫咗最後一條。最最最令我驚喜係，佢起左啲肉出嚟，會將條魚骨擺去炸埋畀你食！勁香勁好味，配啤酒一流！佢啲嘢食賣相睇落好普通，好似啲日式家庭料理，冇乜味精，反而有種地道風味。牛腸唔腥，野菜鮮嫩香甜。見隔離枱日本人叫左串梅子雞咁我又跟單先，上面嘅紫蘇葉令成個味道昇華。雞皮餃子同炒麵都係水準之內，不過佢咁多菜式真係唔建議食太多澱粉質啦。葱拖羅卷都好有油脂味，唔似平時街外好多淡牟牟。綠茶燒酒同檸檬燒酒就一般啦，冇乜酒味。但總括而言佢個價錢同份量喺香港嘅居酒屋入面算係咁，加埋氣氛襯托，老世員工客人都係日本人，又會同你傾下計，係幾有人情味，真係會忘記呢度係香港，值得一再光臨。