皇室冰廳 (Closed)

近期見客多咗去荔枝角長沙灣，發現都唔少性價比高、價錢平份量足嘅抵食午餐，啱哂一眾想開源節流慳多個錢嘅打工仔元州街呢條大直路上都有堆茶記，其中就數呢間皇室冰廳門面較為光鮮起眼，離遠一望就望到。價錢以同區而言屬中等，午餐包愛心湯水，就算外食嘅日子都可以滋補吓養吓生🥳為配合疫情，餐廳除咗搓手液外，仲提供埋消毒紙巾，食都食得放心啲～好耐無食焗飯，呢度有得選擇豬扒/魚柳/雞扒，醬汁亦可菠蘿蕃茄/咖喱二擇其一，夠哂人性化✨我揀咗菠蘿鮮茄芝士焗雞扒意粉，上枱果然無失望，茄醬酸甜適中，仲有件件鮮茄，有口感得嚟茄味濃郁。雞扒大大件，厚身嫩滑，預先切件再焗，方便食用，唔洗客人自己切，避免切碎哂啲意粉嘅情況🤣如果再多啲芝士會更香口～朋友點嘅咖喱魚柳意粉，咖喱椰香味突出，口感帶薯仔嘅顆粒感，夏天食完出身汗尤其消暑。魚柳大小適中，都算幾厚肉，脆身又唔會炸得太油，同咖喱好夾👍🏻👍🏻上菜速度快，即使即製焗飯落單後10分鐘內已經上枱，唔怕lunch hour一個鐘食唔切。