群眾小炒王 (Closed)

不嬲都偏好小店同埋老鋪,有得揀嘅時候都會選小店先,因為唔知幾時會冇咗間舖.一開始見到依間群眾小炒王,鋪面大,裝修又唔古老,諗住慢慢食都冇所謂.今日先發現門口有塊招牌話已經營業咗好多年,即時興趣大增.呢度真係幾大間舖,午飯嘅高峰期都坐唔滿.呢度好多散客,通常圍埋圓枱排排坐.叫咗個香草汁野菌斑腩飯,本來叫熱檸茶,但係侍應好好人咁提醒我冷熱同價,為咗唔辜負佢,當然即刻轉做凍檸茶啦.餐牌寫明餐湯送完即止,估唔到一點左右就送曬啦,如果想飲就要早啲嚟啦.野菌自然係蘑菇,冬菇粒,呢啲本身都係淡口野,加上香草汁稀咗啲,芡汁唔夠濃所以掛唔上雜菇嗰度,所以淡茂茂.洋蔥同埋青椒略生,咬落索索聲.魚腩係條狀,唔係砌到一嚿嚿咁,雖然炸過,但係可能放喺香草汁一段時間,炸魚已經淋曬,所以食落嗰層脆皮會韌韌地,幾怕呢種口感.至於味道,賣急凍魚柳嘅味道囉.又唔算係差嘅,而且分量其實好多,絕無欺場.凍檸茶明明講咗要小冰,但係冰都係多到去膝頭哥,搞到杯檸茶淡晒.