Le Rêve (Closed)

經過朋友介紹先知銅鑼灣有間咁高質而且性價比高既fine dining。六道菜980蚊有呢個級數既食材，其實係好抵！ 首先麵包方面係熱辣辣烘好，微脆表面加上佢有少少蒜香既牛油，已經對呢度好大期望。頭盤方面有蟹肉制成既撻同埋一口蟹餅，蟹肉味突出又唔會太咸！然後已經有一個寶盒裝住既魚子醬赤蝦同埋吞拿魚。魚子醬超濃郁而且完全唔腥，配合赤蝦既鮮甜爽滑口感，整體非常夾。吞拿魚刺身既魚身好爽口而魚味突出！黑松露北海道帶子亦係好高質，帶子煎得岩岩好外脆內軟，加上黑松露醬汁，絕對係味蕾享受!另外有金蠔忌廉湯，蠔炸過後好有鮮味配合埋忌廉同湯，飲完後蠔既香味亦不斷係口腔遊走！比目魚柳煎既火喉適當，魚肉保留肉汁同時爽口，魚皮好脆亦有濃濃既魚味。主菜方面我地加咗個日本A5和牛，和牛紋理仲好清晰，油脂比例岩岩好唔會好肥膩，亦都煎得好靚岩岩好3成左右。至於羊架方面真係得好輕微羶味，肉質鮮嫩層次好豐富。甜品方面有白朱古力慕絲再包裹住芒果，唔會太甜，作為甜品岩岩好! 整體真係非常高質而且每款食材都新鮮，加上煮得好精巧，非常滿足！