十二味貴陽牛肉粉 (Closed)

早前睇網站見到呢間牛肉粉好似好正，不過好多人排隊，我就趁下午茶時間鼠出嚟試吓！好彩兩點半黎到唔使排隊。門口有一系列嘅調味醬產品。叫咗全家福牛肉麵因為乜都有齊嗮，好大碗！另外加左豆乾同埋滷蛋，加完送到黎先發現原來全家福牛肉麵都附有。湯底係清燉湯底，味道清清地有啲牛骨味，配上滑嘟嘟嘅米線味道唔錯！d餸亦都好豐富！有牛肉粒、牛展、牛筋、牛肚仲有豆乾同滷蛋，一碗麵足夠兩個人食。所有嘅牛醃得好入味而且唔韌。天氣咁熱，另外仲叫咗個涼麵，職員推介有新口味，可以加啲孜然辣粉，我地就試左一個，啲面係京式冷麵，無米線咁軟身，加上左啲辣粉同辣油令整個麵食落好刺激！另外配上一份五香牛筋，質地軟淋五香味濃，好match! 最後叫多個卷粉都係凍食嘅，我個人就最喜歡呢個，佢落咗小小醋調味令個粉食落好開胃，而且個粉煙煙韌韌好正！上邊有啲好似炸豬油咁嘅脆粒，好香口！配上青瓜絲好啱夏天食！題外話，枱上面仲有少少溫馨提示，感覺呢啲小店好窩心！