昌發泰國粉麵屋

Open Now

Now Closed

當冇錢去旅行，但係又身痕，你會點解決？我會去九龍城扮去泰國旅行。九龍城簡直係一塊福地，能夠滿足晒你想去泰國嘅慾望。先嚟個泰國人泰式按摩，然後食個芒果糯米飯，再去泰國小店Shopping，仲可以去生果檔買榴槤，最後當然係食泰國菜醫醫肚啦！昌發係其中一間好鍾意嘅泰國菜。通常都要等位，除非好似今日咁夜啲9pm先去。今晚簡簡單單食咗少少嘢：生蝦刺身，馬拉盞炒芥蘭，龍眼冰。生蝦刺身絕不欺場的前菜，隻隻生蝦都又厚肉又爽甜，中間開邊連生蒜食，又辣又爽真係好過癮。而且靈魂在於鮮魚露，中間切碎嘅辣椒一食就辣到冇朋友。越辣越想食，次次都食到咀唇痲痺。馬拉盞炒芥蘭逢吃泰菜必食！咸咸香香鑊氣十足，芥蘭新鮮，條條都脆卜卜，炒埋一碟好惹味。師傅刀工亦不錯，每條都厚而短，容易入口。份量亦足夠，唔會唔夠食。龍眼冰飲品有點失色，凍飲旨在止辣。全杯都是罐頭龍眼加糖水，而且超多冰，不喝也罷。