上海廳 (Closed)

雖很多人說領展好像魔鬼，只招引大財團，厄殺小店生存空間，又迫店舖豪裝，但作為街坊小巿民，覺得它有好有唔好，十幾年前在這小屋邨，邊有咁多餐廳選擇呢，都靠領展先有呢啲改革，就好似上海廳，坐得舒服，食得開心，唔出城都可以食上海菜，超方便。我幾鍾意食嫩雞煨麵，佢係砂鍋雲吞雞個雞湯底，又唔駛食咁大壇野，可謂一個人的浪漫，講返呢個湯底夠濃郁，麵條軟滑掛湯，有唔少雞胸粒粒，同埋少少菇片同菜頭片，簡單得來營養平衡。生煎鍋貼有三大件，煎得唔夠香脆，只係微煎，睇落似蒸，好處係無咁熱氣，咬下發現肉汁豐富，有鮮香肉味，有點似小籠包的feel。黃金四季豆，學港女話齋，係邪惡之物，用左鹹蛋黃，鈉同膽固醇都較高，而且多數較油，但上海廳這碟做得不太油，較乾身，鹹蛋黃份量頗多，夠惹味，略嫌四季豆較扁身，不夠飽滿。豆沙鍋餅同黃金四季豆相似，都係唔太油膩，但比較乾身，紅豆餡料份量足夠，味道幾甜，餅皮不算太厚身，食完甜品滿足曬。