新匯江美食中心

Open Now

Now Closed

同屋企人喺深水埗呢間茶餐廳叫餸食飯。呢間好多街坊都有食開，喺區內幾乎個個都識。入邊環境真係比較窄，同埋噪音真係比較多，所以一般都係食吓晚飯唔會坐得好耐。我哋叫咗四樣餸，分別係：椒鹽九肚魚、生炆班頭腩、薑蔥蝦雞煲同埋馬拉盞鮮魷炒芥蘭。四樣餸都好惹味，而且都足料大份，十分抵食。特別係椒鹽九肚魚，啲魚新鮮炸，炸到好脆椒鹽又香口。鮮魷炒芥蘭入面有好多鮮魷，冇偷工減料，同埋啲魷魚煮到啱啱好，又鮮又彈牙。班頭腩好大碟，啖啖魚肉好正。整體嚟講抵食又大份，水準又唔錯。不過，環境上真係又窄又嘈，坐唔得耐。