樂天皇朝 (雅蘭中心)

Open Now

Now Closed

又到每月例飯既時間，今個月小弟友人話想食小籠包，所以揀左樂天皇朝。小弟一行3人，原本職員只係安排小弟坐普通位，部長好好人又細心，小弟只係細細聲講左句：可唔可以坐梳化位？部長就話：梗係可以啦。小弟都點左唔少野食，但份量都係剛剛好夠飽。如果大家都比較大食既話，可能要多點一兩個粉麵喇。特色皇朝小籠包（八色）：小弟同友人們一人一份，一黎唔太多，二黎可以試哂咁多隻口味。佢建議先食原味，再由人參（綠色）開始慢慢順時針食過去。除左黑松露同川味，剩低果6色小弟就覺得一樣喇。李白醉雞：加10蚊可以要雞脾，小弟覺得無咩所謂，所以唔加錢喇。醉雞酒味唔夠，不過雞處理得唔錯，幾嫩滑下。肉碎欖菜乾媥四季豆：肉碎少少辣，好香。四季豆都好爽。松子鮮果桂魚：菠蘿落得都算多，一啲都唔孤寒。桂魚炸得好脆，好好食；條魚都唔會話好細條，小弟三個男士都好夠食。雪菜鹹肉炒年糕：少少咸咸地咁，加上雪菜咪道好夾，依個感覺比起上海炒年糕好，無咁膩，完美清碟。