食力點心·雞煲專門店 (Closed)

今次嚟到尖沙咀呢間食力試雞煲加火鍋，價錢幾經濟，冷氣配置尚可，環境尚算舒服。果度嘅侍應服務非常好，仲有個操流利廣東話嘅外籍姐姐好有趣、好識講笑。而食雞煲同打邊爐之前，好特別嘅係會有點心拼盤比你做前菜，裡面有潮洲粉果同金黃色嘅雲南野菌餃。值得一提嘅係佢哋個雲南野菌餃入面非常足料，香噴噴、金黃色而且熱度都非常足夠，而驚潮洲粉果入面有馬蹄或者有陣草青味嘅朋友可以試下呢個！再講佢個雞煲啦，我嗌左小辣覺得個辣度啱啱好，都好足料，配料大概係用左香茅、辣椒、乾蔥等嘅材料去整，所以都幾惹味。另外啲雞嘅口感都可以，亦都唔算「鞋」。食到咁上下佢就會幫你加清湯底，比你任叫打邊爐，都係青口、肉類、粉麵等任叫嘅野食。值得一讚既係個和牛，食落口感不錯，而且牛肉肉味都好勁啊！另外佢啲肉丸（墨魚丸、豬肉丸等）係手打嘅，所以口感都唔錯，而且唔算太多粉搓。整體而言，呢間食力價錢都幾平，服務態度同食物質素都唔錯！鐘意打邊爐嘅大家可以去試試。