一起素 (Closed)

我係個食肉獸，去食べ放題同食自助餐都食好多嘢，仲要係食好多肉。只要有我嘅場合，去べ放題同食自助餐就一定唔會蝕本。學年初素食餐廳開咗，本來只係打算抱住「試吓啦」嘅心態去試一試，但就比佢嘅高質食物，搞到鍾意咗去素can食嘢。（我哋中大人鍾意叫中大嘅飯堂做乜can 乜can，素食餐廳就自然係素can）最鍾意素can 嘅新鮮食材，響一菜難求嘅中大，咁難得可以搵到咁多鮮味蔬菜，當然會愛上。（要知道，宿生如果餐餐無菜，日常生活會好麻煩）素can 既蔬菜都唔係普通既灼菜，而係經過精心調味。食過一次香草雜菜，佢唔係好油，但會有好濃嘅香草味。食過一次豆豉南瓜，意外地兩者嘅味道都好夾，南瓜亦非常爽甜。叫嘢食有兩種形式，可以係套餐，有飯有一大碟餸有個湯；或者叫一／兩餸飯。兩餸飯28蚊，以中大餐廳黎講算係貴少少，但勝在夠真材實料。兩餸飯／套餐以外，每加一個餸就要8蚊。但佢有個套餐叫「自在隨緣」，38蚊，但就有三個餸，加一小碟齋鹵味，同埋跟餐嘅湯，非常抵玩。