Mano (The L. Square)

銅鑼灣，一個充滿餐廳嘅區域淨係計西餐都多不勝數，但係，上個星期我朋友帶我去食咗一間銅鑼灣嘅西餐廳，個名叫做MANO，竟然仲畀到驚喜我。呢間西餐廳響銅鑼灣廣場二期同鵝頸橋嘅中間，都相當易搵。入到去呢間採光度好高嘅餐廳，熱情嘅工作人員好快就安排咗座位畀我哋。我哋今次叫咗「10oz燒紐西蘭肉眼扒」、「芝士肉醬千層麵」，另外我哋仲分別加咗沙律同埋餐湯，同埋每人一份甜品添。等咗一陣，沙律同埋餐湯都上咗枱喇，份量同埋味道都唔錯，之後千層麵都嚟埋呢個千層麵芝士十足，面層芝士嘅甘香焦脆，中層芝士拉絲，加埋肉醬同埋千層麵口感非常豐富，亦都好有層次，非常值得推介。仲有份量十足嘅燒肉眼扒，肉味十足，亦不失嫩滑。最後，是日嘅甜品係tiramisu整得都算唔錯，有微微嘅酒香滲出。順帶一提，呢一個lunch set係包埋飲品嘅，食完個晏，同朋友嗌杯嘢飲吹多陣水，都真係一件賞心樂事。