屋喔 (Closed)

有日，同事話帶我去一處幾好食嘅台式餐廳，於是就行遠啲去到呢一間叫「屋喔」嘅餐廳。 午餐時段真係多人到我大叫「屋喔」啊！不過，有一點人間有愛嘅係，店門前有免費嘅荔枝水比等候中嘅食客飲。當時除咗飲完覺得甜之外，果然心裡面都涼快咗啊。等左陣，終於入坐睇睇餐牌，二話不說揀咗最保守嘅「鹽酥雞湯扁麵」加「桂圓冰紅茶」。可能多人嘅關係，食物都等候咗一段長嘅時間，而飲品先上，個人覺得味道有點微妙，淡淡嘅紅茶配酸酸微甜嘅果肉味（有點不明？門外荔枝水更好飲的感覺）食物到咗後有啲失望，雖然等咗好耐，但炸雞唔算好熱，而且感覺比較老，好似放咗好耐翻炸嘅口感；扁麵嘅湯底色夠，但味道略為清淡，無乜突出嘅感覺，所以配起麵再加上雞肉，感覺比較一般。總結，幾鐘意佢地店外會體貼地為門口等候嘅食客準備飲品，呢種做法都好似開始流行。但沒辦法，整體食物味道一般，同等餐時間較長，所以令人對想再去嘅想法有點卻步。