Med Chef (Closed)

返工返尖沙咀厚福街嘅嘢都食得7788 ，聽朋友講最近開咗間新嘅cbd主題餐廳，本身都未試過CBD嘅嘢，都係抱着試一試嘅心態去食。餐廳嘅主題似乎係用紫色，門口好大個燈牌，就咁睇有啲似係一間吧。我同朋友一人叫咗一杯嘢飲，兩杯都係梳打，兩杯唔會太甜，而且幾易入口。同埋都幾鍾意佢嘅杯杯碟碟，己有格調喎。我哋叫咗一個poke bowl，上菜嘅時候都打咗個突，都幾大份喎，又有三文魚又有吞拿魚。佢哋加咗啲青豆，識落己有口感，脆脆地咁，幾得意。我哋仲叫咗一個蒜香大蝦意粉，食得出大蝦唔係啲平價貨，蝦肉好彈牙，而且成個碟咁長，抵讚。意粉方面覺得份量可以再大啲就好啦，不過女仔食到啱啱好嘅，鍾意食蒜香意粉嘅話應該都會鍾意食，好香蒜蓉味，用咗扁意粉所以都幾彈牙，唔會煮到太淋。最後我哋仲叫咗牛扒，因為朋友係一個牛魔王，去到邊都要食牛。好香牛味，而且值得一提嘅係配菜有菊芋蓉，唔係薯蓉，識落好清新，唔會好油膩，我哋清左碟添。同埋擺盤都值得一讚，上面嘅炸蓮藕片令到成件事靚咗。總括嚟講食物嘅質素都好好，唔知係咪心理作用，食完之後好似真係有放鬆少少，可能食完好嘢都已經放鬆啲掛哈哈。