Le Three (Closed)

放假經過呢間餐廳，見佢粉藍色門面睇落唔錯，又好耐無食西餐,就入去試下。餐廳用藍白色海洋做主題，整體裝修風格一致，連餐牌都令人好似置身希臘愛琴海一樣。我地點左套餐D再加碟意粉，餐湯椰菜花煙肉薯蓉湯嘅調味唔錯，唔會太濃，仲有粒粒煙肉。三文魚黎麥沙律亦好開胃，蔬菜全部切得大細恰當，少少帶酸嘅醬汁加黎麥好夾，本身唔太鐘意食黎麥，但今次成功令我改觀，值得一讚！主菜西班牙黑豚豬肉眼扒擺碟精美，豬扒煎得啱啱好，肉質鮮嫩多汁，配合醬汁食味道一流，功力十足嘅一道菜！之後嘅車厘茄香草汁大蜆扁意粉亦唔錯，扁意粉入口質感佳，大蜆亦份量十足。飲品焦糖曲奇沙冰好創新，味道略甜但飲得出焦糖曲奇味，表面嘅綿花糖同cream非常好味！甜品係法式焦糖燉蛋，焗得表面金黃，燉蛋香滑有蛋香，唔會太甜😋總括而言，餐廳環境舒適寧靜，食品質素高，想食西餐嘅朋友可以一試。