小馬哥

Open Now

Now Closed

。O小姐。街坊小店。日常。今日嚟到佐敦，發現充滿人情味嘅街坊小舖頭！下午茶或者炒粉麵飯都仲係30幾蚊，仲要大大碟，足料！兩人叫咗個下午茶，雙拼公仔麵（五香肉丁拼沙嗲牛肉），個面煮得啱啱好，好爽身，唔會太淋，配埋個凍鴦👍🏻。再加一個豬扒炒麵，豬扒有好多舊，個面底好大，好有鑊氣！喺呢度食嘢個感覺就好似喺太安樓食嘅炒粉麵飯！估唔到喺佐敦都可以有呢一個感覺！雖然喺橫街入面，舖頭細細，但係一打開門之後，入面乾淨企理，仲有兩隻貓貓添！其中一隻貓店主，都已經14歲，但係主人照顧得佢好好，我哋仲親眼見到主人幫佢R痕添。而另外一隻就好乖喺個紙盒度瞓緊覺覺豬。聽返老闆講，原來之前有第三隻貓，不過有一面突然間唔見咗，隔籬舖頭都係，好似話應該係俾人偷咗😿呢間餐廳應該主力都係做街坊生意，老闆好健談，同客人都可以傾吓偈，我諗呢啲就係舊香港，舊街坊，夠人情味嘅感覺。而係而家連鎖店林立嘅時候，真係買少見少。💪🏻同老板既對話中，覺得佢對動物都好有愛心，成間餐廳都企企理理，麻雀雖小，但係都填飽咗唔少人個胃。