康蘭餅店

Open Now

Now Closed

本打算周圍行下，點知發現康蘭餅店有新鮮出爐既蛋撻、椰撻同葡撻，我呢個蛋迷俾佢深深吸引住。最後，買左三個蛋撻、三個椰撻同一個葡撻。而蛋撻同椰撻都係細size，同我地平時食開既細好多，總共用左十六蚊。蛋撻：係我最鐘意食既牛油皮，一口咬落去淡淡蛋香味，買完到食個陣已經隔左大約十五分鐘，但佢仲keep住係熱辣辣，個一刻真係好感動！個蛋真係全部都係純蛋，唔似出面咁溝曬水，失去左蛋本身既味道。而且甜度適中，令甜味搶唔走蛋既味道。加上牛油皮好有咬口，唔會咬落去就碎到周圍都去，陣陣淡香味，真係好好味呀！椰撻：椰撻上面冇一粒既車厘子，有啲失望。帶有椰絲，味道略甜，同時餡料同椰絲味道唔能夠中和，令椰撻過甜。但餡料好軟熟，又香，配合牛油皮既質感，整體唔差，值得一試。葡撻：同平時食開既好唔同，蛋香依然，焦糖做得岩岩好，味道香甜。而酥皮一樣整得比較實正，兩者相輔相成，呢個都好好味，都要試試下！